Amada ninfa

Si dissipan sas nues in s'aera
Canno t'ischidas tue Ninfa amada

Amada Ninfa canno ischidas tue
Si este ancora notte vaghet die
Pro potes cuntemblare ogn'ora a tie
Pasu non dia tennere in neddue
Dio amare continu fue fue
Comente fera non currende a inie
Columba si non m'amas mi ucchie
Chi dae me sa morte es perdonata

In pettus mi asa azzesu amore tale
Chi de vortes catenas resto presu
In pettus amore tale mi asa azzesu
Chi non tenet Cupidu s'uguale
No mi parese un'essere mortale
Tantu tale fiamma mi ada inchesu
Si non t'ido vortissimu unu pesu
Me rennet custa vita angustiada


Sos pilos chi t'adornana in sa testa
Paren bentu viladu in su Pernasu
Si los isorves vormana unu rasu
Mantu chi ponet donzi coro inu festa
S'idet s'arte divina e manifesta
D'essere tue terrena est'unu casu
Un'istante su coro no a pasu
Ragiro ca ti sese allontanata

De marmaru vivissimu sa fronte
S'immortale Cellini ata iscolpidu
Si la sullevas restatada abbellidu
De un'astru novellu s'orizzonte
Sas feras abbandonana su monte
Sos puzzones olvidana su nidu
Curret s'umanitade da ogni lidu
Dae s'immensu vascinu attirada

Sos oios fachen ridere sa natura
Tantu sono espressivos e perfettos
Isvhidan in su coro sos affettos
E cancellan da isse ogni tristura
E statica si virmat sa natura
Bidenne chi ses priva de diffettos
Dae s'ente supremu sun elettos
A render custa terra illuminata

Sa ucca profumata in s'alenare
De soaves profumos delicados
Su visu de colores incarnatos
Solu sa rosa podet imitare
Divinas laras fattas pro vasare
Dentes de diamante incantonados
In perfetta armonia cumbinados
T'adornana su visu immaculada


Su tuiu tantu bellu e delicatu
Ch'ido s'abba valenne in su poiolu
Mi torrat a sa mente ogni consolu
Canno miro su visu imbidiatu
Chin arte rara e fine es cunformatu
Chi mi parede chi esistidi isse solu
Si non bi at deas in s'eternu polu
Restas in custu munnu insuperada

Isconnota delizia in su sinu
Vruttu celeste mai assaporatu
De raru aroma tale profumatu
Chi non possedit perunu giardinu
Opera chi s'artefice divinu
Chin manu singulare at modellatu
Su lizzu pius bellu e delicatu
Este a cunfrontu a sa rosa isfozzida

Una sottile ispola solu cinta
Dae un'aneddu ti vormana su chintu
D'ogni bellesa Greca as vintu
D'ogni dea chi in tela ana dipintu
S'arte de su prinzellu restat binta
Sas operas distruis de Curintu
Formana sas ideas Labirintu
Canno pensan chi ses cosa animata

Sas manos d'una fata solu ebbia
Sas manos tuas potene imitare
Manos fattas pro potere ricamare
Su sognu d'una bella fantasia
Ha! Si Pro sorte chin sa manu mia
Las potere un'istante carignare
Pero' devo continu agonizzare
In custa vida trista e ritirata


Dea gentile canno es chi mi naras
Pro custa sorte mea itt'as derisu
Faghe che canno iscansana unu risu
Mi nerzana chi m'amas chin sas laras
Proitte su chi sentisi non declaras
Canno es chi ti decidisi de prezisu
Narami vranca e chin sinceru risu
Cale es sa sorte mea riservata

Si dissipan sas nughes in s'aera
Canno t'ischidas tue Nina amada.