Olvidu

No mi dese olvidare anima bella
Vinas chi tenzo palpidu su coro

No mi dese olvidare unu mamentu
Pro cantu in custa terra isto vivenne
Cann'isto solitariu in s'apposentu
A tie amo ancora isto pensenne
E pare chi lontanu unu mamentu
Mi giamet lastimosu e pianghenne
Beni so tantu tempus isetenne
Pero' sospiro invanu e m'addoloro

Mi torrete a sa mente su passadu
Chi mi tormenta su coro affligidu
Cuddu tempus de rosas fioridu
De lizzos e de violas semenadu
Troppu lestru pro me sinch'est coladu
In su menzus istante m'es fuidu
Menzus chi no l'aere connoschidu
Ca solu a bi pessare minn'accoro



Tue chi ses lontana vorsis gai
Chi ti olvides de me pro calchi istante
pero' geo in su coro appo costante
S'affettu anticu chi no mori mai
Passo sa vida in penas e guai
Lagimenne pro te perdidu amante
So continu in su sonnu dellirante
Ca in sonnu ti abbrazzo lizzu oro

T'ido in sonnu Angelica vigura
E de Venus mi pares pius rara
Sos vezzos chi ti adornana sa cara
Binghene de sas deas s'ermosura
Ma su sonnu es chimera o pena amara
Canno m'ischito creschet sa tortura
Bido velada a luttu sa natura
Ca es lontanu s'idolo c' adoro

Cuddos fiores c'abbellin s'Aprile
Ricos de soavissimos olores
Pintos de milli varios colores
Allegran donzi coro giovanile
Tue ca pero' ses bella e gentile
Allumas in su pettu sos amores
Superas in profumos sos fiores
Annientas su dulze incantu issoro

Pero' t'ido dormitu in sonnu ebbia
Non ti potto de veras cuntemplare
A tantu non credia de arrivare
De t'ider solu chin sa vantasia
Ma si tue lu cheres bella mia
Cuddu tempus felice det torrare
Ca su coro non cessat de t'amare
Nemmancu in pettus d'un'ingratu moro


Aes chi attraersates s'orizzonte
Prestatemi sas alas unu die
Pro chi sia cuncessu ancora mia
Passare a bolu su prus altu monte
Tale de ide s'adoratu fronte
Isfidenne tempestas d'abba e nie
A currer celerissimu a inie
Aues cudd'amabile tesoro

Currer in dun'istante inosservatu
A uv'es Nina mia amada tantu
Cheria pro lenire su piantu
In forma de un'ae cambiatu
E pustis dae s'oggettu miratu
Chi es de su coro meu unicu incantu
Cumpone soavissimu unu cantu
Torrenne a bolu lentu a monteoro

Musas c'azzes abbittu in Elicona
In su Pierinu in su Parnasu monte
Pro un'ora ponidemi in sa fronte
De poeta immortale sa corona
Pro poder laudare una matrona
Chin versos de eclissare Anacreonte
Abba leade in su Parnasu fonte
E dazzeminne a biere boll'imploro

Daemi Orfeu sa lira sonante
Sa chi at fattu su munnu estasiare
O suaves sirenas de su mare
Sas melodias dazzemi un'istante
Creide a sos dolores d'un'amante
Naschidu pro suffrire e pro amare
Chi cheret chi su cantu alleviare
S'eternu e dolorosu malincoro


Ma miserinu ieo ite disizzo
Versos chin armonia lira e alas
Poveru disdicciadu e no m'abbizzo
Chi sono vanas pro me similes galas
Inutilmente su coro m'atraffizzo
Ca s'istella vunesta giuto in palas
De s'affannosa ruche sas iscalas
Chin abbunnantes lagrimas insoro

Morit su sole ispunta sa luna
Diffunnenne bagliores de argentu
Sas baianeddas dae s'apposentu
S'innessini a sa ianna a una a una
Su rusignolu in sa campagna bruna
Cantat innos suaves in sacru accentu
Brillan sos astros de su virmamentu
Che incantada notte in messidoro

Dulzes sos toccos de s'Ave Maria
Falan festosos dae campanile
s'allegrat dogni ispiritu gentile
A tanta soavissima armonia
Amore Amore infundet custu ebbia
In dogni pettus unu vestosu Aprile
Deo pero' non brinco su giannile
Solu chin sos fantasmas mi dimoro

Sas pallidas fantasimas sun solu
Cumpagnas fidelissimas a mie
Sa natura es ridenne notte e die
Ma non tenet pro me unu consolu
Ido s'aera trista vaghe nie
Sonat a continu sa campana a dolu
Ispica duncas s'anima su olu
Si no sa vida a ferru mi divoro


Assumanco sa vritta sepoltura
Paghe riposu nessi mi ata dare
Siat in luttu o festa sa natura
No la den custos oios pius mirare
Sas fantasimas umbras de tristura
Non den sa sacra tumba violare
Si det su vrate isfatu riposare
De tantu sentimentu crepa coro

Canno non det su corpus pius sufrire
Det'essere de sos vermes alimentu
In sa losa inserradu a lentu a lentu
Si det in pruer vrittu cunvertire
Assumancu es cessatu ogni patire
Su dolu s'amorosu sentimentu
De sa dura catena su turmentu
Sas penas variadas chi assaporo

Inie una viola lastimosa
De umana sustanzia nutrida
In attunzu det bennere a sa vida
Chin fozzas vellutadas lutuosa
Sutta fozzas d'ortiga custodida
Occulta det restare birgonzosa
E de sa tumba mea casta isposa
Ornamentu des'essere de decoro

Canno sa die tres de Sant'Andria
Es finida ogni sacra vunzione
In ammentu a s'antica passione
Tue des bennere a sa tumba mia
Isparghennebi ozzas de olia
Des faghes lagimenne orazione
Pentida de sa vorte afflizione
Chi mi desti vivenne melaoro


Sa viola nde goddi pro ammentu
Giughela custodita sempre in sinu
Ca pro esser gasie su destinu
Custu corpus li desi s'alimentu
Issa ti det ripeter de continu
Dogni secretu meu sentimentu
Iscrittu ti lu lasso in testamentu
Tenela custodita che tesoro

No mi dese olvidare anima bella
Vinas chi tenzo palvidu su coro.